Shoqata “Trojet e Arbrit” ka reaguar ashpër pas ngjyrosjes së monumentit të heroit kombëtar Gjergj Kastrioti – Skënderbeu në qytetin e Prizrenit, një veprim që e ka cilësuar si “sulm të shëmtuar” ndaj figurës më të rëndësishme historike shqiptare.

Në reagimin e bërë publik të dielën, Shoqata shprehet e “shokuar” nga ky akt, duke e cilësuar si një provokim të drejtuar nga qarqe “antishqiptare dhe antikombëtare”, që sipas tyre janë të ndikuara nga ideologji politike neotomane dhe pansllaviste.

Shoqata u ka bërë thirrje organeve të rendit dhe drejtësisë në Kosovë që të veprojnë me urgjencë për të identifikuar dhe ndëshkuar autorët e këtij akti.

“Shoqata “Trojet e Arbrit“ fton policinë e Republikës së Kosovës dhe prokurorinë që të merr masa shumë të shpejta sa nuk është bërë vonë dhe ta bëj burgosjen e sjelljen para drejtësisë të personave që e kryen këtë akt të shëmtuar.Pas bërjes publike të Shoqatës “Trojet e Arbrit“ për një demostratë gjithëshqiptare më 28 nëntor 2025, në qytetin e Prizrenit për neglizhimin dhe mosdhënien e lejes për Muranën e Gjergj Kastriotit në Prizren,tash qarqët antishqiptare kanë filluar atakimin e drejtëpërdrejt të Monumentit të Gjergj Kastriotit në Prizren”, thuhet në reagim./Arbresh.info